21 de febreiro de 2014 as 20:00 horas
22 de febreiro de 2014 as 18:00 horas
Tralo éxito de público obtido durante a temporada 2012-2013 coa xira do Quebranoces, espectáculo no que os bailaríns do Centro Coreográfico Galego (CCG) compartiron escenario con alumnos de escolas e conservatorios de danza de toda Galicia, a unidade de produción coreográfica da Xunta de Galicia emprega a mesma fórmula de colaboración didáctica para a súa nova montaxe: A bela adormecida, adaptación coreográfica de Mercedes Suárez a partir do ballet composto por Tchaikovski.
A aposta do Centro Coreográfico Galego por este modelo participativo, que foi respaldado polos máis de 13.400 espectadores que congregou o seu anterior espectáculo, ten como obxectivo dar un novo impulso á súa liña de traballo coas escolas galegas de danza nunha dobre vertente que procura tanto a creación de novos públicos para esta disciplina artística, como a motivación dos estudantes e profesores mediante a súa participación no desenvolvemento dunha produción coreográfica a nivel profesional.
Ademais, a Orquestra Sinfónica de Galicia implícase de novo nun proxecto do CCG, ao que acompaña na estrea de A bela adormecida os días 21 e 22 de febreiro no Pazo da Ópera da Coruña. Estas funcións para público xeral están precedidas de sesións didácticas concertadas con diferentes centros escolares, programadas do 12 ao 14 de febreiro.