Música Práctica. Ensemble Música Práctica en Santiago de Compostela

A interacción dos diferentes timbres e cores progresa desde as presentacións máis ou menos individuais de cada instrumento a momentos de clímax de todo o ensemble, e incorpora momentos onde o público participa na paisaxe sonora (por exemplo, a partir de palmas). A narrativa musical elabórase a partir de seccións baseadas en diversas técnicas musicais: aparecen mosaicos sonoros puntillistas —similares a algunhas técnicas utilizadas por Pierre Boulez (1925) e Karlheinz Stockhausen (1928-2007)—, atmosferas con tramas máis densas (György Ligeti, 1923-2006), elaboracións simples dun único son (Giacinto Scelsi, 1905-1988), ou melodías de inspiración popular ou tradicional (Luciano Berio, 1925-2003). En definitiva, o compositor Fernando Buide (1980) utiliza nesta obra unha ampla gama de técnicas musicais utilizadas polos compositores máis significativos da segunda metade do século xx. A artista Gema Cilleros (1971) traballa en colaboración co compositor achegando a parte pictórica e de narrativa visual neste traballo interdisciplinar conxunto. A partir da composición musical Cilleros puxo cor á música, creando imaxes e ritmos plásticos en todos os movementos.