En Revolta Natural propoñemos experiencias nas que vivir a natureza de xeito libre, creativo e en compaña.
Moitas familias nos demandan poder participar cos nenos-as nas actividades e por iso ampliamos o rango de idade da Ludoteca Natural.
Todo o que desexe pasar os días da Semana Santa xogando e aprendendo do contacto coa natureza, poderá presentarse nos lugares de encontro sen necesidade de reservar praza. Aló serán recibidos por un equipo de monitores da Asociación que guiará e dinamizará diferentes actividades en función dos intereses dos participantes durante as mañás, en horario de 10:00 a 14:00, dende o luns 14 até o venres 17 de abril de 2014.
Achégate e participa dun tempo de vacacións en contacto coa natureza:
- No entorno das instalacións de Garabullos (Sistallo, Cospeito)
- No entorno do CI Terras do Miño (Paseo do Rato, Lugo)
Ó chegar, xogaremos para coñecernos dun xeito divertido e falaremos en asemblea sobre as expectativas de cada quen para o día. Pasaremos a mañá, a tarde ou o día enteiro axudando nas tarefas de coidado da horta e dos animais, xogando no bosque, realizando xogos de confianza, de persecución, de estratexia, de busca, de asexo, de velocidade, de axilidade..., cantaremos acompañados dos sons da natureza creando melodías rítmicas, con madeira, con follas, con pedras...; crearemos obras de arte pintando con terra, fiando con lá, facendo masas naturais,...; e colaboraremos na organización de tarefas da dinámica xeral do grupo. Ó remate do día, antes de marchar para casa, valoraremos conxuntamente o resultado do realizado e elevaremos novas propostas de actividades para o día seguinte.