XIX edición da Carreira Popular Lugo Monumental

A XIX edición da carreira popular Lugo Monumental xa ten data e será o vindeiro domingo, 19 de decembro. Este ano contará con novidades.

Neste 2021 a Lugo Monumental contará cunha distancia aproximada de 10 km aínda que, e como consecuencia das intervencións que se están realizando na capital e que afectan a partes do percorrido, este sufrirá unhas pequenas modificacións de carácter eventual.

Así, tanto a saída como a meta estarán situadas na avenida de Ramón Ferreiro, coa praza da Horta do Seminario como centro de operacións. O traxecto seguirá sendo en parte circular ao redor da Muralla, cunha última volta por riba do adarve, mantendo o espírito de todas as edicións anteriores pero adaptándoa ás circunstancias.

Este ano tan só haberá proba de adultos deixando para ao 2022 a volta das categorías inferiores a medida que as garantías sanitarias para as crianzas, o colectivo menos inmunizado, se vaian asentando e a seguridade, tanto para participantes como para acompañantes, recupere os valores prepandémicos.

A carreira popular Lugo Monumental cumpre este ano a súa 19 edición e, como en anteriores ocasións, contará co patrocinio de Caixabank. A súa recuperación supón a finalización da interrupción que supuxo a chegada do coronavirus ao mundo das carreiras populares.

Dende o Concello informan de que a proba cumprirá en todo momento coas recomendacións establecidas para eventos e actividades multitudinarias, “para a que se tiveron en conta os protocolos correspondentes no contexto da nova normalidade provocada pola Covid19 e, en función da súa evolución, estará sometida ao cumprimento das normas de prevención que establezan as autoridades sanitarias en cada momento.

A medida que se achegue o día da proba a organización irá informando convenientemente dos temas de maior interese público como pode ser o itinerario, a forma de inscrición, o procedemento de recollida de dorsais así como dos protocolos a aplicar, entre outros aspectos.

Do mesmo xeito, proximamente estará dispoñible toda a información na páxina web da carreira https://10klugomonumental.com