Noticias de Hoy
lineas_de_fuga
Fecha: 19/01/2021
Horario: 18:00 a 20:30

Taller Liñas De Fuga: Historia, Estética E Política Da Arte

 

Do 19 ao 21 de xaneiro de 18.00 a 20.30 horas na Fundación Luís Seoane

Liñas de fuga é un seminario de lecturas dirixido polo artista e crítico cultural Marcelo Expósito que percorre os debates xurdidos durante o último século ao redor da historia, a estética e a política da arte en relación cos avatares sociais e políticos do seu tempo. Desde un punto de vista cronolóxico, o seminario iníciase coa irrupción dos debates acerca da práctica da arte e a cultura na Europa de entreguerras e a partir de aí, pon o acento en como a crítica, a teoría e a historiografía da arte recibiron achegas do marxismo, a psicanálise, a socioloxía e a historia social, o estructuralismo e o postestructuralismo, o posmodernismo crítico e o feminismo. Trátase dun seminario ‘de lecturas’ porque consistirá na lectura e discusión dun corpus de escritos significativo das ‘liñas de fuga’ trazadas polas heterodoxias no campo das prácticas e das ideas artísticas ao longo dos últimos cen anos. Liñas de fuga é un seminario nómade que varía dependendo dos contextos nos que leva a cabo. Ata o de agora, realizouse presencialmente no Museu d’Art Contemporani de Barcelona (MACBA), na Facultat de Belles Arts da Universitat Politècnica de València ( UPV), e en formato virtual para a Academia A Central (Barcelona). Durante o seu desenvolvemento na Fundación Luís Seoane, profundarase en elementos vinculados coa obra de Luís Seoane, como as relacións entre arte e política ou as tensións entre a herdanza da modernidade, as vangardas históricas e o punto de inflexión posmoderno.