Dia Mundial da Auga en Ourense
Dia Mundial da Auga en Ourense
O Concello de Ourense vén de presentar as actividades relacionadas co Día Mundial da Auga, o 22 de marzo, “un recurso esencial e básico para a vida, e un elemento inherente á cidade de Ourense”, en palabras do alcalde, Jesús Vázquez.”Ourense é cidade de augas, capital termal e cidade de ríos, e todo isto debe ser para nós un estímulo que nos leve a traballar arreo para ser cada vez máis ambiciosos e cada vez máis comprometidos en acadar a mellor xestión e utilización da auga”, dixo.
Luns 19 de marzo
Celebrarase un importantísimo Foro Termal do Eixo Atlántico no Centro Cívico de Colón, coa presenza de representantes de diferentes lugares da eurorrexión.
Martes 20 de marzo
Haberá unha cata de augas na ETAP das Coiñás de 12:00 a 14:00 horas.
Mércores 21 de marzo
A concelleira de Educación, Belén Iglesias, e o alcalde de Ourense, Jesús Vázquez, acudirán ao colexio Divina Pastora para traballar coa rapazada nunha nova sesión de Aqualoxía, un programa que se desenvolve en colaboración con Viaqua.
Jueves 22 de marzo
9h00 a 14h00 Día Mundial da Auga, data na que se instalará unha carpa (de ) con obradoiros e xogos ao redor da auga na praza Maior. A partir das 10h00 No Campus de Ourense, celebrarase a Xornada de portas abertas do Campus da Auga. Esa mesma noite iluminarase a ponte maior de cor azul para conmemorar a efeméride.
Do 22 ao 24 de marzo (de xoves a sábado) poderemos gozar do horario ampliado na piscina termal das Burgas, que permanecerán abertas até as 23 horas. “Coido que poucas experiencias hai tan pracenteiras nesta cidade como darse un baño termal pola noite. “, reflexionaba o rexedor.
Domingo 25 de marzo
Roteiro Termal: Ao redor das augas. Realizarase unha andaina especial polo día da Auga. Quéreselle achegar á cidadanía a posibilidade de descubrir e aprender máis sobre as augas a través dun roteiro interpretado para pór en valor todos os elementos culturais, etnográficos e naturais.
A saída farase desde a Ponte Vella (esquina Ribeiriño) ás 10:00 horas, e percorreranse as marxes peonís do río pasando pola Chavasqueira, a fonte do Tinteiro, o Muíño da Veiga e Outariz. Ao remate do paseo, o tren das Termas estará agardando polos participantes no roteiro (billete non incluído).
A actividade é gratuíta e aberta a persoas de todas as idades, e recoméndase anotarse no enderezo de correo turismo@ourense.es ou no teléfono 988.366.064. Así mesmo, aconséllase vestir calzado cómodo e vestimenta acorde co tempo, levar prismáticos e cámara de fotos, e levar auga para hidratarse e un petisco para media mañá.