III Edición de DivulgaTerra en Lugo
III Edición de DivulgaTerra en Lugo.
A vicerreitora de Coordinación do campus de Lugo, Montserrat Valcárcel, presidiu este martes a presentación da III edición de DivulgaTerra, o evento que pretende darlle relevancia pública ao traballo dos investigadores e investigadoras do Campus Terra, así como promover o galego como ferramenta para comunicar os resultados dese traballo de investigación, e que este ano aspira a poñer o foco nas mulleres científicas que cada día desenvolven a súa actividade no campus.
O evento estrutúrase este ano en tres sesións temáticas (dedicadas ás Ciencias da Saúde; Ciencias e Tecnoloxía; así como ás Artes, Humanidades, Ciencias Sociais e Xurídicas) nas que ademais de intervencións breves nas que os investigadores darán a coñecer as súas respectivas liñas de traballo, haberá un relatorio amplo protagonizado por unha investigadora relevante do campus que exporá ante un público non especializado a súa actividade investigadora.
O xoves 15, na Casa do Saber, a profesora da USC Mecedes Novo falará do seu traballo na loita contra o alzhéimer, o día 22 será a quenda de Rosa Mosquera, quen afondará no vínculo entre innovación, sistemas agroforestais e incendios, mentres que o 29 de novembro, Ana Goy aportará unha visión do Pórtico da Gloria despois da restauración.
No acto de presentación tamén estivo presente o responsable de Normalización Lingüística da USC en Lugo, Xusto Rodríguez, quen destacou a importancia de que dende a universidade se creen espazos nos que teña cabida a divulgación científica. Na mesma liña se pronunciaron a deputada provincial Pilar García Porto, quen salientou a actividade que dende a USC se leva a cabo a prol da Cultura e da Educación lucense, así como Tamara González, quen volve participar neste certame, logo de facelo nas dúas edicións anteriores e quen considera que iniciativas coma esta fan sentirse máis seguros aos investigadores e investigadoras máis novos do campus ao permitirlles “empezar na casa”.
Programa da sesión inaugural
Ademais de Mercedes Novo, o xoves 15 de novembro, a partir das 19.00h., a primeira das sesións desta terceira edición de DivulgaTerra, dedicada ás Ciencias da Saúde, contará coas intervencións de María Permuy Mendaña, quen explicará que é a microtomografía computerizada; Susana Remesar Alonso, quen falará da infección por Rickettsia spp. en carrachas recollidas en Galicia; as parasitacións en gando vacún nas comarcas de Ordes, Arzúa e Terra de Melide será obxecto de análise por parte de David García Dios; mentres que a interacción parasitaria entre o mexillón de río e o salmón será analizada por Pedro A. Castrillo Arias. A sesión culminarase coas intervencións de Emanuel Felipe de Oliveira Filho, quen falará de metais pesados; e Pablo Sánchez Quinteiro quen afondará na anatomía do sexto sentido.
Programa mércores 22 de novembro
A Casa do Saber acollerá este mércores 22 de novembro, a partir das 19.00h, a segunda sesión de DivulgaTerra, o evento a través do cal se pretende promover o uso do galego como idioma de divulgación científica, e que nesta ocasión acollerá un relatorio da catedrática da USC Rosa Mosquera sobre o papel do pastoreo no monte na prevención dos incendios forestais.
Ademais de Mosquera, nesta segunda sesión de DivulgaTerra tamén tomará parte Ignacio García Rodríguez, quen centrará a súa intervención en como vai afectar o cambio climático aos carballos. A continuación, Mónica Ruy afondará na modelaxe biomecánica das árbores; e Paula Rodríguez Villamayor tentará responder á cuestión ‘Que é iso da comunicación química?’. Julio A. Seijas Vázquez pronunciará o relatorio ‘Microondas: quentando desde dentro’; mentres que Xesús Feás Sánchez e María Amparo Ferreira Golpe falarán da vespa velutina, nas súas respectivas intervencións.
O DivulgaTerra celebrará a súa derradeira sesión desta terceira edición o xoves 29, ás 19.00h, na Casa do Saber. Nesta ocasión, as Artes, Humanidades e Ciencias Sociais serán as protagonistas dun evento no que a entrada é libre e de balde ata completar aforo, e no que a profesora da Facultade de Humanidades Ana Goy, aportará unha visión do Pórtico da Gloria despois da restauración.