Maratón Atlántica Coruña42 2019
Maratón Atlántica Coruña42 2019.
O Concello da Coruña e a Federación Galega de Atletismo organizan o próximo 14 de abril de 2019 o VIII Maratón Atlántica Coruña42, cunha distancia homologada de 42.195 metros, e que pertencerá ao calendario nacional da RFEA.
É intención do Concello que a Maratón Coruña42 se consolide en pouco tempo, como referencia nacional polo seu percorrido chairo e rápido, así como pola súa xestión organizativa.
Un atleta popular, tanto de menos de 3 horas como de 5 horas nun maratón, é un deportista habitual que desenvolve uns hábitos de vida saudables. O circuíto de carreiras populares da Coruña pon en forma a un elevado número de cidadáns.
Esta carreira é especialmente adecuada para fomentar o deporte popular por dous motivos fundamentais:
- Non hai límites de idade para a súa práctica.
- Pola preparación e adestramento continuos, que esixe o feito de finalizar a proba.
O maratón tende a consolidar corredores permanentes e iso, á súa vez, conduce a que estes teñan necesidade de facer carreiras máis curtas ao longo do ano, coa consecuente promoción das mesmas, nas que á súa vez participan corredores novos que aínda non chegaron ao nivel de preparación, así se vai constituíndo unha verdadeira estrutura de carreiras populares que facilitan a práctica do deporte en toda a sociedade.
É unha oportunidade máis, para educar aos participantes e ao público, na protección do medio ambiente.
Pode actuar como un axente dinamizador da nosa cidade, da cultura, do turismo e a hostalaría.
Obxectivos:
- Fomentar a práctica saudable do atletismo como deporte aeróbico.
- Promover o deporte popular entre os coruñeses e coruñesas, captar a participación de corredores amateurs e profesionais.
- Integrar a cidade no circuíto internacional de maratóns e atraer corredores doutras cidades, o que terá un impacto turístico importante, e proxectará tamén ao exterior a idea de que A Coruña é unha cidade que promove o deporte.
- Madurar a capacidade organizativa en grandes acontecementos deportivos.
- Propiciar a creación de contactos con outras cidades, organismos e institucións deportivas nacionais e internacionais.
- Conseguir obxectivos transversais relacionados con diversos aspectos de educación da cidadanía.
- Implicar a toda a cidadanía no desenvolvemento do maratón, sendo unha xornada dirixida tamén a espectadores, cunha oferta de actividades lúdicas para que o público anime festivamente aos participantes da proba, e goce ao máximo posible desta cita atlética.
PERCORRIDO
A saída estará situada no Cantón Grande (Obelisco) e a meta na praza de María Pita.
Un circuíto de 42.195 metros, homologado pola Real Federación Española de Atletismo (R.F.E.A).
O circuíto estará completamente cerrado ao tráfico e acoutado con valos e outros elementos delimitadores naqueles tramos nos que non exista unha diferenciación natural polo mobiliario urbano.
Os únicos vehículos que poderán seguir a proba serán os designados pola organización.
As carreiras terán lugar unicamente pola calzada do tráfico rodado, sen utilizar ningunha zona peonil que non estea sinalizada. Está prohibido o uso como zona de carreira das beirarrúas, sebes centrais, zonas axardinadas etc. O incumprimento desta norma, así como o recortar sobre o trazado oficial, poderá supoñer a descualificación da persoa infractora.
Poñemos á súa disposición, en formato pdf, o plano do circuíto e descrición do percorrido do Maratón C42 e da carreira popular 10K da C42.
Peche do control de carreira
O peche da proba de Maratón realizarase ás 14:00 horas (5 horas e media despois da súa saída). Así mesmo, establecerase un tempo de 2 horas e 45 minutos para o paso polo Medio Maratón. Pasado o tempo de peche correspondente tanto para o Medio Maratón como para o Maratón, a persoa participante que siga na carreira deberá retirarse do circuíto oficial de competición.
O peche da proba da carreira 10K realizarase ás 10:15 (1 hora e media despois da súa saída).
Control técnico das carreiras
As carreiras estarán controladas polo Comité Nacional de Xuíces da RFEA e o Comité Galego de Xuíces da FGA.